Azam FC yazipiku Simba, Yanga

AZAM FC imefuzu tena hatua ya makundi ya Kombe la Shirikisho Afrika ikiitoa ZED FC ya Misri, ikiwa ni rekodi ambayo Simba na Yanga hazijawahi kuiweka.

Ushindi wa bao 1-0 lililofungwa na Idd Seleman ‘Nado’ dakika ya 63, juzi Jumamosi, lilitosha kuivusha Azam FC kufuzu hatua ya makundi ya Kombe la Shirikisho Afrika kwa jumla ya mabao 2-1, baada ya mechi ya kwanza iliyochezwa Misri Oktoba 16, 2026, kuisha kwa sare ya bao 1-1.

Kufuzu kwa Azam FC kumeifanya kuandika rekodi mpya ikiwa ni timu ya kwanza kutoka Tanzania kuingia hatua ya makundi ya Kombe la Shirikisho Afrika kwa mara ya pili mfululizo, baada ya kufanya hivyo msimu uliopita wa 2025-2026.

Azam FC iliyoanzishwa Julai 23, 2004 ikifahamika kwa jina la Mzizima FC, kwa mara ya kwanza ilifuzu makundi Kombe la Shirikisho Afrika msimu wa 2025-2026, hivyo msimu huu ni mara ya pili mfululizo wakiongozwa na Kocha Florent Ibenge raia wa DR Congo ambaye ndiye amefanya yote hayo kwa misimu miwili.

Ibenge aliyetua Azam Julai 5, 2025, akitokea Al Hilal Omdurman ya Sudan, anaendelea kujenga jina lake ndani ya kikosi hicho kilichopanda Ligi Kuu Bara Julai 27, 2008, kufuatia kuiwezesha kucheza makundi ya michuano ya CAF mara mbili, hatua ambayo makocha waliotangulia hawakuwahi kufika.

Wakati Azam ikiweka rekodi hiyo, Simba imeshiriki Kombe la Shirikisho Afrika kwa misimu saba tofauti, lakini mara mbili pekee imecheza makundi ikianza 2021-2022 ilipoishia robo fainali, kisha 2024-2025 ilipocheza fainali na kupoteza kwa jumla ya mabao 3-1 dhidi ya RS Berkane kutoka Morocco. Misimu ambayo haikufanya vizuri ilikuwa 2007 (Hatua ya Awali), 2010 (Hatua ya Pili), 2011 (Hatua ya Mtoano), 2012 (Hatua ya Pili) na 2018 (Hatua ya Kwanza).

Kwa upande wa Yanga, imeshiriki Kombe la Shirikisho Afrika mara sita, huku tatu ikicheza makundi, ikianza mwaka 2016 na 2018 na kuishia hatua ya makundi, kisha msimu wa 2022-2023 ilifika fainali, japo ilikosa ubingwa kwa kanuni ya bao la ugenini dhidi ya USM Alger ya Algeria, baada ya kuchapwa nyumbani Dar es Salaam mabao 2-1, kisha ugenini ikashinda 1-0. Misimu ambayo haikufanya vizuri ilikuwa 2007 (Hatua ya Awali), 2008 (Hatua ya Kwanza) na 2011 (Hatua ya Awali).

Azam FC iliyoanzia raundi ya pili ya Kombe la Shirikisho Afrika msimu huu wa 2026-2027, msimu uliopita ilifuzu makundi kwa mara ya kwanza na kumaliza nafasi ya tatu kundi B na pointi tisa, nyuma ya vinara Wydad Casablanca kutoka Morocco.

Katika kundi hilo, Wydad Casablanca ilimaliza na pointi 15, nyuma ya AS Maniema Union ya DR Congo iliyomaliza nafasi ya pili na pointi 12 na Azam FC ya tatu ikiwa na pointi tisa, huku Nairobi United ya Kenya ikiburuza mkiani bila ya pointi.

Kocha Mkuu wa Azam FC, Florent Ibenge, amesema mafanikio hayo yanatokana na ushirikiano mkubwa uliopo kati ya viongozi na wachezaji wa kikosi hicho, japo ni chachu ya wao kufanya vizuri zaidi kutokana na rasilimali nzuri zilizopo.

Hata hivyo, Azam imekuwa haina rekodi nzuri upande wa Ligi ya Mabingwa Afrika kwani haijawahi kufuzu hata makundi, wakati Simba na Yanga zimewahi kufika hadi robo fainali.

Yanga msimu huu imefuzu makundi Ligi ya Mabingwa Afrika ikiwa ni mara ya nne mfululizo, rekodi ambayo hakuna timu nyingine ya Tanzania imeiweka katika michuano hiyo.

Timu hiyo jumla imefuzu makundi Ligi ya Mabingwa Afrika mara tano huku mara tatu ikiishia makundi ambapo ni 1998, 2024-2025 na 2025-2026, huku 2023-2024 ikiishia robo fainali. Safari hii 2026-2027 tusubiri tuone.

Kwa upande wa Simba, nayo imefuzu makundi ya Ligi ya Mabingwa Afrika kwa mara ya pili mfululizo. Jumla Simba imecheza makundi ya michuano hiyo mara saba ambapo 2003 na 2025-2026 iliishia hapohapo, huku 2018-2019, 2020-2021, 2022-2023 na 2023-2024 ikiishia robo fainali. Sasa 2026-2027 ikifuzu makundi pia.