Shikangwa, Mukandayisenga wana vita ya ufungaji

NI kama vita ya ufungaji bora hadi raundi ya kwanza inamalizika imeachwa kwa washambuliaji wa kigeni wa watani wa jadi Simba Queens na Yanga Princess.

Hadi mzunguko wa kwanza unatamatika Simba Queens inaongoza ligi na pointi 31 kwa tofauti ya pointi 11 na mpinzani wake JKT Queens mwenye 20 ikiwa nafasi ya tatu baada ya kucheza mechi tisa huku Yanga ikiwa nafasi ya pili na pointi 30 zikitofautiana pointi moja.

Achana na vita ya msimamo kwa timu hizo za Kariakoo lakini kuna vita nyingine ya chini chini inaendelea kwa washambuliaji wao, Jentrix Shikangwa wa Simba na Jeaninne Mukandayisenga wa Yanga.

Hadi sasa Mukandayisenga anaongoza kwenye orodha ya wafungaji akiwa na mabao 15 wastani wa kufunga bao moja kwa kila mechi.

Shikangwa ambaye ni msimu wake wa tatu kuitumikia ligi ya Tanzania akitokea Vihiga Queens ya nchini kwao Kenya, ana jumla ya mabao 10 akiwa nafasi ya pili kwenye msimamo wa wafungaji.

Hadi sasa katika ligi kuu ya wanawake zimefungwa Hat-trick sita kutoka kwa wachezaji wanne na wapinzani hao wawili wamefunga mbili kila mmoja.

Mukandayisenga alifunga hat-trick dhidi ya Fountain Gate Princess akifunga mabao matano peke yake Yanga ilipoondoka na ushindi wa mabao 5-4, nyingine alifunga dhidi ya Mashujaa Queens chama lake lilipoondoka na ushindi wa mabao 4-1.

Kwa upande wa Shikangwa alifunga dhidi ya Geita Queens na Bilo Queens Simba ikishinda mabao 4-0, wachezaji wengine wenye hat-trick moja moja ni Veronica Mapunda wa Mashujaa na Winifrida Gerald wa JKT Queens.