Mgomo: Liverpool yapewa msala wa Man City

LONDON, ENGLAND: MASHABIKI wanaotaka hatua kali dhidi ya Manchester City wameanza kuisukuma Liverpool kuongoza mgomo wa ligi nzima, wakitaka timu zote zikatae kucheza dhidi ya miamba hiyo hadi adhabu itakapotolewa.

Liverpool inatarajiwa kukutana na City katika mchezo wa Ligi Kuu England, Oktoba 11, huku wazo hilo likitaka Reds ichukue hatua ya kuondoka uwanjani na kuungwa mkono na klabu nyingine kwa kususia mechi dhidi ya City.

Hoja hiyo inatokana na mtazamo wa baadhi ya mashabiki kwamba matokeo ya mechi dhidi ya City yanaweza kupoteza maana iwapo adhabu itakayokuja baadaye itabadilisha msimamo wa ligi.

Kwa mtazamo wao, timu zinaweza kuhifadhi nguvu kwa ajili ya michezo mingine badala ya kutumia nguvu katika mechi ambazo huenda matokeo yake yakafutwa au kubadilishwa kutokana na adhabu itakayotolewa.

“Wakati umefika kwa Liverpool kuchukua hatua. Inaonekana suala hili linazidi kuwa la kisiasa katika mazungumzo kuhusu adhabu. Njia pekee tuliyo nayo ya kulazimisha suluhisho la haraka ni kugomea mechi za Man City,” ilielezwa katika hoja hiyo.

Wanaounga mkono wazo hilo wanaamini bila shinikizo la kutaka mamlaka zichukue hatua kwa haraka, City inaweza kuishia kupata adhabu ambayo wanaiona kuwa nyepesi.

Hata hivyo, wito huo ni maoni ya baadhi ya mashabiki na si msimamo rasmi wa Liverpool, Ligi Kuu England au mamlaka nyingine za soka.

Mjadala huo umeibuka kutokana na kesi ya City ya tuhuma za ukiukaji wa kanuni za kifedha za Ligi Kuu, ambapo klabu hiyo ilipatikana na hatia katika sehemu kubwa ya tuhuma ilizokabili.

Sasa mjadala umehamia kwenye aina ya adhabu ambayo City inaweza kukumbana nayo, endapo mchakato wa kisheria na rufaa hautabadilisha uamuzi uliotolewa.

Baadhi ya mashabiki na wachambuzi wamependekeza hatua kali zaidi, ikiwemo uwezekano wa wamiliki wa City kulazimishwa kuiuza klabu hiyo.

Wazo hilo limeibua swali iwapo mauzo ya lazima yanaweza kuchukuliwa kama adhabu endapo wamiliki wataondoka wakiwa wamepata faida kubwa kutokana na ongezeko la thamani ya klabu tangu walipoichukua.

City ilinunuliwa kwa takribani pauni 300 milioni, hivyo iwapo italazimishwa kuuzwa kwa thamani kubwa zaidi, wamiliki wake wanaweza kuondoka na faida licha ya klabu kukumbana na adhabu.

Mjadala huo pia umefungua mjadala mpana kuhusu umiliki na ufadhili wa klabu, pamoja na kiwango cha uwazi kinachopaswa kuwepo katika mapato, matumizi, mikataba ya udhamini na vyanzo vya fedha.

Baadhi ya wachambuzi wamehoji pia kwa nini City haikuwasilisha mapema baadhi ya ushahidi unaodai kuthibitisha uhalali wa vyanzo vya fedha hizo wakati wa mchakato wa uchunguzi.

Kwa upande wake, City imeendelea kusisitiza kuwa fedha hizo zilipatikana kwa njia halali, huku suala hilo likiwa sehemu ya mchakato wa rufaa na majadiliano yanayoendelea.

Katika mjadala huo, mfumo wa Ujerumani wa umiliki wa klabu unaojulikana kama kanuni ya 50+1 umetajwa kama mfano unaoweza kujadiliwa katika kuongeza ushiriki wa wanachama na mashabiki katika umiliki wa klabu.

Kwa sasa, kinachosubiriwa ni hatua zitakazofuata baada ya mchakato wa kisheria, huku aina ya adhabu itakayowekwa dhidi ya City ikiwa miongoni mwa masuala yanayofuatiliwa kwa karibu.

Hivyo, sakata la City sasa limevuka mipaka ya klabu hiyo pekee na kuibua mjadala mpana kuhusu uwazi wa fedha, umiliki wa klabu na namna Ligi Kuu England inavyosimamia kanuni zake.