UEFA yaonya soka Ulaya yagawanyika

LONDON,England; UEFA imeonya kuwa matumizi makubwa ya fedha katika usajili yanazidi kuigawa soko la wachezaji barani Ulaya katika mfumo wa “kasi mbili”, huku klabu za Ligi Kuu England zikiongoza kwa mbali kwenye uwekezaji.

Katika ripoti yake ya hivi karibuni kuhusu mwenendo wa vipaji na mashindano ya soka la klabu Ulaya, UEFA imeonyesha namna shughuli za usajili za klabu za England zinavyozidi kutawala soko hilo.

Kwa mujibu wa taarifa hiyo, matumizi ya klabu za Ligi Kuu England kwenye usajili yamefikia kiwango kikubwa kiasi cha kuzidi matumizi ya nchi nane zinazofuata kwa ukubwa wa soko la usajili barani Ulaya kwa pamoja.

Andrea Traverso, mkurugenzi mtendaji wa fedha wa UEFA, amesema mwenendo huo unaibua wasiwasi kutokana na kuongezeka kwa thamani za uhamisho na tofauti kubwa ya uwezo wa kifedha kati ya ligi.

“Thamani za uhamisho zinaendelea kupanda kwa kasi, hasa katika soko la England, jambo linaloongeza shinikizo la kifedha kwa klabu siku zijazo,” alisema Traverso.

Ameongeza kuwa hali hiyo inaashiria kuongezeka kwa mkusanyiko wa vipaji katika baadhi ya masoko na kuzidi kwa tofauti ya nguvu ya ununuzi.

Ripoti hiyo inaonyesha pia kuwa klabu za England zilihusika katika zaidi ya asilimia 60 ya mikataba ya usajili, huku wastani wa fedha zilizotumika kumsajili mchezaji mmoja kutoka nje ukiwa karibu euro milioni 24.

Kwa kulinganisha, wastani katika ligi nyingine kubwa za Ulaya ulikuwa kati ya euro milioni nne na tano kwa mchezaji, jambo linaloonyesha pengo kubwa la uwezo wa kifedha katika soko hilo.

UEFA imeonya kuwa mabadiliko makubwa ya thamani za wachezaji au kupungua kwa mahitaji ya wanunuzi yanaweza kuwa na madhara makubwa kwa klabu zinazobeba madeni.

Ripoti hiyo pia imeonyesha ukubwa wa matumizi ya klabu 20 za Ligi Kuu England, ambayo yalifikia kiwango kinacholingana na asilimia 56 ya mapato yao ya mwaka, ikilinganishwa na wastani wa asilimia 33 katika muongo uliotangulia kabla ya janga la Covid-19.

Aidha, klabu za England zinazidi kufanya biashara kubwa miongoni mwao. Thamani ya uhamisho ndani ya soko la England iliongezeka kwa asilimia 44 hadi kufikia euro bilioni 1.55, huku soko hilo likiwa na thamani inayokaribia jumla ya masoko matano yaliyofuata kwa pamoja.

Baada ya biashara za ndani ya England, mtiririko mkubwa zaidi wa fedha ulikuwa kutoka Bundesliga ya Ujerumani kwenda Ligi Kuu England, uliokadiriwa kufikia euro milioni 690.

UEFA pia imebaini kuongezeka kwa idadi ya uhamisho wenye thamani ya zaidi ya euro milioni 50. Idadi hiyo iliongezeka kutoka 14 mwaka 2024 hadi 23 mwaka 2025, kabla ya kufikia 35 mwaka 2026, huku klabu za Ligi Kuu England zikihusika katika 29 kati ya uhamisho hiyo.

Kutokana na shinikizo la kufuata kanuni za kifedha, klabu nyingi zimeendelea kutegemea mauzo ya wachezaji waliokulia kwenye akademi zao kwa sababu mapato hayo yanaweza kuonekana kama faida kubwa kwenye vitabu vyao vya fedha.

Kwa mujibu wa UEFA, klabu za Ulaya zilipata wastani wa faida ya euro bilioni 6.8 kutokana na mauzo ya wachezaji hao katika dirisha la usajili, ikiwa ni ongezeko la euro milioni 655 ikilinganishwa na mwaka uliopita.

UEFA pia haikupata ushahidi mkubwa wa klabu kutumia mfumo wa umiliki wa klabu nyingi kuhamisha wachezaji kwa bei zilizopandishwa au kushushwa kwa makusudi.

Thamani ya jumla ya uhamisho wa aina hiyo ilikuwa euro milioni 152, dhidi ya thamani ya soko iliyokadiriwa kuwa euro milioni 159. Zaidi ya nusu ya matumizi hayo yalitokana na uhamisho kati ya Chelsea na Strasbourg.