CEOs Luxury Retreat na ndoto ya gofu Zanzibar

SOKA bado ni mfalme wa michezo Zanzibar, lakini taratibu mchezo wa gofu unaanza kujenga nafasi yake kwa namna tofauti.

Katika visiwa hivyo, kama ilivyo Tanzania Bara, soka ndilo linalobeba mashabiki wengi, huku mpira wa kikapu, wavu, netiboli, kuogelea na michezo mingine ikiendelea kutafuta nafasi katika jamii. Pamoja na kuwepo kwa michezo hiyo ambayo inachezwa maeneo mengi, pia kuna mchezo wa gofu ambao umeanza kuonekana kwa sura nyingine.

Mchezo wa gofu si tu kama mchezo wa kushindana na kujenga vipaji, bali pia kama jukwaa linalounganisha michezo, biashara na utalii, hapa ndipo umuhimu wa mchezo huu unapoanzia.

Hivi karibuni, Zanzibar iliwakutanisha wachezaji mbalimbali wa gofu kupitia mashindano yaliyopewa jina la CEOs Luxury Retreat Golf Tournament, yaliyofanyika Sea Cliff Resort & Spa Golf Club. Mashindano hayo yalishirikisha zaidi ya wachezaji 80 kutoka Tanzania Bara, Zanzibar na nchi mbalimbali zikiwemo Kenya, Uganda, Zambia, Malawi, Afrika Kusini na Nigeria.

Mashindano hayo hayakuwa na wachezaji chipukizi, lakini nyuma ya ushindani wa wachezaji wakubwa kulikuwa na jambo muhimu zaidi kwa mustakabali wa gofu Zanzibar ambayo ni programu za kukuza kizazi kijacho cha wachezaji.

UWANJA WA GOFU WA SEA CLIFF

Uwanja wa gofu wa Sea Cliff imekuwa moja ya vituo vinavyotoa mazingira ya kujifunza na kuendeleza gofu Zanzibar, hasa kupitia programu zinazolenga kuwafikisha watoto na vijana kwenye mchezo. Hapa ndipo simulizi ya CEOs Luxury Retreat inapopata uzito wa kimichezo.

Ingawa watoto hawakuwa sehemu ya mashindano ya mwaka huu, tukio hilo liliongeza mwonekano wa mchezo ambao vijana hao wanaandaliwa kuucheza kwa kiwango cha juu zaidi.

Kwa mtoto anayekua akishuhudia wachezaji kutoka Tanzania na nchi mbalimbali wakifika Zanzibar kushindana, tukio kama hilo linaweza kuwa zaidi ya burudani.

Kwa wachezaji chipukizi, inaweza kuwa picha ya kile anachoweza kufikia endapo ataendelea na mafunzo, akapata ushindani na kupewa mazingira sahihi ya kukuza kipaji chake.

Mwenyekiti wa Chama Cha Gofu Tanzania (TGU), Gilman Kasiga, anasema kuwa maendeleo ya gofu hayawezi kutenganishwa na kuwafikisha watoto kwenye mchezo mapema. Kasiga ameangazia ongezeko la watoto wanaoanza kucheza gofu, baadhi yao wakiwa na umri wa miaka mitano, akiona hatua hiyo kama msingi muhimu wa kujenga wachezaji wa baadaye.

Anasema kuwa gofu ni mchezo unaohitaji muda kujenga mbinu, uzoefu, nidhamu na uelewa wa mchezo. Mtoto anayeanza mapema, kwa hiyo, anapata muda mrefu zaidi wa kujifunza misingi na kuendeleza uwezo wake. “Klabu ya Sea Cliff ndiyo klabu yenye programu ya kuendeleza vipaji. Ina wachezaji wengi chipukizi ambao lengo lao kubwa ni kufikia hatua ya juu kabisa katika uchezaji,”  amesema Kasiga.

KIZAZI CHA KESHO

Lakini kumwingiza mtoto uwanjani pekee hakutoshi. Kipaji kinahitaji kocha, mazoezi, vifaa, mashindano, ushindani na mfumo unaomruhusu mchezaji kupanda hatua kwa hatua. Hapo ndipo programu za vijana zinapokuwa na umuhimu mkubwa. Mpango wa vijana unaohusisha Tanzania, Mauritius, Misri, Kenya na Afrika Kusini ni miongoni mwa jitihada zinazolenga kupanua wigo wa mchezo na kuwapa watoto nafasi ya kuujua gofu mapema.

Mpango huo umeungwa mkono na Bloomberg Philanthropies ya Michael Bloomberg pamoja na mashirika yanayohusika na maendeleo ya gofu duniani.

Kwa Zanzibar, programu kama hizi zinaweza kuwa daraja la kuwatoa watoto kwenye hatua ya kujifunza hadi kwenye mashindano ya ushindani. Mtoto anayeanza akiwa na miaka mitano, kwa mfano, akipata mafunzo endelevu, anaweza kuwa na msingi mzuri zaidi wa mchezo anapofikia miaka 10 au 12.

Akipata mashindano ya kutosha, makocha bora na nafasi za kukutana na wachezaji wengine, safari hiyo inaweza kuendelea hadi ngazi za kitaifa na kimataifa.

Si kila mtoto anayeshika klabu leo atakuwa bingwa kesho, lakini kila mtoto anayeingia kwenye mchezo anaongeza idadi ya wanaoweza kutoa vipaji vya kiwango cha juu baadaye.

CEOS LUXURY RETREAT YAONGEZA KASI

Katika mazingira hayo, CEOs Luxury Retreat imeongeza mwonekano wa gofu Zanzibar.

Mashindano hayo yaliyodhaminiwa na Vodacom Tanzania PLC yaliwakutanisha zaidi ya wachezaji 80 kutoka nchi saba za Afrika, jambo lililoongeza ushindani na kuifanya Zanzibar kuwa sehemu ya mkusanyiko wa wachezaji na wadau wa mchezo. Kwa upande wa kimichezo, uwepo wa wachezaji kutoka nchi mbalimbali una maana zaidi ya matokeo ya mashindano.

Unaonyesha kiwango ambacho Zanzibar inaweza kufikia katika kuandaa matukio ya gofu, huku pia ukiwapa wachezaji wa ndani nafasi ya kuona viwango na mitindo tofauti ya mchezo.

Kwa vijana wanaokua ndani ya mazingira hayo, uwepo wa mashindano makubwa unaweza kuongeza hamasa na kuwapa picha ya safari inayoweza kufuatwa. Ndiyo maana thamani ya mashindano haya haiishii kwenye mshindi anayebeba kombe.

Yanasaidia pia kuuweka mchezo mbele ya macho ya jamii na wadau ambao wanaweza kuwekeza katika maendeleo yake.

GOFU YAFUNGUA MILANGO

Lakini gofu Zanzibar haijaishia kwenye kutafuta wachezaji bora pekee. Mchezo huo umeanza pia kuwa sehemu ya fursa nyingine, hasa biashara na utalii.

Wachezaji kutoka Tanzania Bara na mataifa mengine walipofika Zanzibar kwa ajili ya mashindano, walipata nafasi ya kuona mazingira ya visiwa hivyo nje ya uwanja.

Wakati huohuo, viongozi wa biashara, wataalamu na wafanyabiashara waliokutana kupitia mashindano walipata mazingira ya kujenga mahusiano na kubadilishana mawazo. Mkurugenzi wa Biashara wa Vodacom Tanzania, Nguvu Kamando, alisema nafasi hiyo ndiyo inayofanya kampuni hiyo kujivunia kuhusishwa na tukio hilo. “Gofu ni zaidi ya mchezo. Ni jukwaa linalowakutanisha watu, mawazo na fursa,” amesema Kamando.

Amesema mashindano hayo yamewakutanisha viongozi kutoka sekta mbalimbali, hivyo kutoa nafasi ya kujenga mitandao ya biashara, ubia na kubadilishana uzoefu. Kwa Zanzibar, hali hiyo inaendana na juhudi za kulitangaza eneo hilo kama kituo cha utalii, biashara na michezo. Hata hivyo, kwa mtazamo wa Mwanaspoti, sehemu muhimu zaidi ni namna fursa hizo zinavyoweza kurudi kwenye mchezo wenyewe.

Tanzania ina viwanja kadhaa vinavyotumika kwa shughuli za gofu, jambo linalotoa msingi wa kuendeleza mchezo. Lakini ongezeko la watoto na vijana wanaoingia kwenye mchezo linahitaji kuambatana na ongezeko la makocha, programu za mafunzo, mashindano ya vijana na fursa za ushindani. Kwa Zanzibar, Sea Cliff inaweza kuwa sehemu muhimu ya mfumo huo.

Klabu inaweza kuwa mahali ambapo mtoto anaanza kujifunza gofu, anajenga uwezo, anapata mashindano na baadaye kuingia kwenye mfumo mpana wa ushindani.

Hivyo, kazi kubwa si kuandaa mashindano mengi pekee. Ni kuhakikisha kuna njia ya kipaji, kuanzia mtoto anayeshika klabu kwa mara ya kwanza hadi mchezaji anayefikia kiwango cha kuiwakilisha nchi.