ManUnited yaanza ligi kwa Kipigo cha 2-0 dhidi ya Hull City
Muktasari:
- Mashabiki wa Manchester United walikuwa na imani kubwa na timu yao baada ya kumaliza msimu uliopita vizuri ikiwa katika nafasi ya tatu kwenye msimamo, lakini kama ilivyoanza msimu uliopita kwa kusuasua ndivyo ilivyotokea.
Manchester, England: IKIANZA na wachezaji wake wote mahiri, Manchester United imeanza ligi vibaya baada ya kuchapwa mabao 2-0 na Hull City kwenye mchezo wa kwanza uliopigwa kwenye Uwanja wa MKM.
Mashabiki wa Manchester United walikuwa na imani kubwa na timu yao baada ya kumaliza msimu uliopita vizuri ikiwa katika nafasi ya tatu kwenye msimamo, lakini kama ilivyoanza msimu uliopita kwa kusuasua ndivyo ilivyotokea.
Hull City ikiwa imepanda daraja msimu huu baada ya kukaa Championship kwa misimu kadhaa ilianza mechi hii kwa mbwembwe huku ikitawala sehemu kubwa ya mchezo na kujipatia bao la kwanza katika dakika ya 17 tu ya mchezo huo likiwekwa kimiani na mkongwe Semi Ajayi, baada ya mabeki wa United kufanya makosa.
Beki huyo raia wa Nigeria amefunga bao hilo la kwanza kwa timu yake baada ya kupita miaka tisa tangu timu hiyo ilipopata tena bao kwenye mchezo wa Ligi Kuu England dhidi ya Man United. Pia ni ushindi wa kwanza kwa timu hiyo dhidi ya United baada ya miaka tisa.
Baada ya bao hilo, United ilicharuka na kuanza kuliandama lango la Hull City lakini mambo yaliendelea kuwa magumu kwao kutokana na wapinzani wao kuweka nguvu kubwa kwenye eneo la ulinzi, lakini wakishambulia kwa mahesabu makali.
Kuonyesha kuwa hawana masihara, Hull City walionyesha kiwango cha juu kuanzia dakika ya 30 hadi 38 na kujipatia bao la pili lililowekwa kimiani na beki mwingine Nobel Mendy aliyefunga kwa kichwa safi.
Kipindi cha pili kila timu ilipambana kuhakikisha kuwa inaonyesha makali yake ambapo mchezo huo ulimalizika kwa ushindi huo wa Hull City na kuwaonyesha United kuwa wanatakiwa kufanya kazi kubwa kwenye michezo ijayo kama wanataka kufanya vizuri msimu huu.
‘’Tulipoteza mipira mingi, lakini nafikiri tunatakiwa kuamka sasa na kuhakikisha tunafanya vizuri kwenye michezo ijayo,’’ alisema Bruno Fernandes.
Kocha wa United Michael Carrick pamoja na kufanya mabadiliko kadhaa bado timu yake ilikosa makali kwenye eneo la kushambulia huku ambalo lilikuwa na wachezaji wake mahiri akiwemo Benjamin Šeško ambaye alifanya kazi kubwa msimu uliopita.
